Сан-Францискода бўлиб ўтган Galaxy Unpacked 2026 тадбирида Samsung 2026 йилнинг асосий флагмани — Galaxy S26 Ultra’ни расман тақдим этди. Асосий сюрприз титан корпусдан алюминий корпусга ўтиш бўлди. Samsung’нинг таъкидлашича, алюминий иссиқликни яхшироқ чиқазиб юборади, бу эса кучли процессор учун жуда муҳим. Galaxy S26 Ultra 6,9 дюймли, 3120 х 1440 пикселли ва 10 битли рангли Dynamic AMOLED 2х экранига эга бўлди. Панель ҳимоясини янги Gorilla Glass Armor 2 ялтирашга қарши ойнаси таъминлайди.

Экраннинг асосий «фишкаси» — Privacy Display функцияси. Иккита турдаги пикселлардан (тор ва кенг) фойдаланиб, экран кўриш бурчакларини шундай торайтириши мумкинки, контентни фақат эгаси кўриши мумкин. Ён томондан қараган одамлар учун дисплей қора кўринади. Функцияни бутун экранда ёки масалан, фақат паролни киритиш майдонида фаоллаштириш мумкин.

Асосий камерада сенсорлар таркиби ўзгармаган, аммо оптика яхшиланган. Асосий модуль - 200 мегапикселли сенсор ва аввалги F/1,7 ўрнига F/1,4 диафрагмали. Бу тунда янада ёрқинроқ суратлар олиш имконини беради. 5 карра катталаштириш ва 50 мегапикселли сенсорли модулда энди аввалги F/3,4 ўрнига F/2,9 диафрагмали объектив ишлатилади.

Қурилмага SoC Qualcomm Snapdragon 8 Elite Gen5 for Galaxy процессори ўрнатилган.

Аккумулятор сиғими аввалги даражада қолди — 5000 мА/соат, аммо симли зарядлаш тезлиги 60 Вт гача ошди (Super Fast Charging 3.0). Симсиз зарядлаш қуввати 25 Вт. Йўқотилган қурилмаларни сантиметргача аниқлик билан аниқлаш имконини берувчи Bluetooth 6.0 қўллаб-қувватлаши жорий этилди.

Аппарат тўртта рангда таклиф этилган: қора, бинафша, ҳаво ранг, оқ. Қурилмага буюртма беришда расмий сайтда яна иккита ранг - «пушти олтин» ва «кумушсимон соя» мавжуд. Олдиндан буюртмалар аллақачон очилган ва 28 февралгача давом этади. Бутун дунё бўйлаб сотувларнинг расмий бошланиши 2026 йил 11 мартга белгиланган.